Cedric Ridderplaat a nase dia 14 di yüli di 1944 den e bario Carthagena den Otrobanda, Curaçao. Cedric ta e di kuater, di nuebe yu di Lourdes i Pascual Ridderplaat. Durante un presentashon na Colombia, e maestro di seremonia tabatin problema pa pronunsiá su nòmber kompletu bon. Esei tabata loke a kondusí na ku su Mama Lourdes a rekomendé pa usa un nòmber artístiko mas fasil. Desde e dia ei Cedric Ridderplaat a sigui su karera komo Ced Ride.

Na edat hopi yòn Ced tabata kanta den kornan na misa di Santa Ana i Santa Famia. Su talento pa kanta a resaltá tambe den lèsnan d muzik na skol. Komo hóben a tabata atmirá kantantenan manera entre otro Augusto Boelijn, Erquimides ‘Kimo’ Candelaria i El Gran Kaluf. Ced a kanta koro i algun kansion komo solista riba e L.P. ‘Misa Alegre’ bou di direkshon di Richard Simon.
 

Na 1960 Ced Ride a kuminsá su karera den músika popular. El a forma parti di gruponan musikal manera entre otro ‘Cyclones del Ritmo’, bou di direkshon di Ewald Chocolaad, i mas despues el a forma parti di e konhuntonan musikal Sonora Antillana, Estrellas del Caribe, Niño Samson & Combo, Combo Aristo, Fermin & Orchestra i e orkesta di Herman Wegewijs, den hotèlnan na Kòrsou di renombre internashonal.
 

Na 1969 Ced ta risibí e premio Tambú di Oro pa su komposishon 'Navidad Sin Padre'. Sin mas un klásiko di nos herensia musikal ku tur aña ta zona na tur emisora i kanalnan di televishon den temporada di Pasku.
 

E susesonan riba dia 30 di mei 1969 tabata motibu pa Ced skirbi e komposishon na papiamentu, 'Nos Kòrsou', ku el a grabá ku Aristo Combo, ku areglo di Juan Camelia. (di felis memoria).

Na 1971 Ced ta partisipá na e promé kòntèst di Tumba pa Karnaval kompañá pa Estrellas den Caribe. Algun aña despues Ced ta aseptá e petishon na su persona pa ta Maestro di Seremonia di loke despues a bira Festival di Tumba pa Karnaval. Siendo M.C. no tabata permití pa Ced kompetí komo kantante pero el a sigui aportá na e festival ku komposishonnan ku diferente kantante a interpretá, entre nan su ruman Sigmund. Tabata durante su presentashon komo maestro di seremonia, ku Ced a presentá e popular Tumba, 'Djengelé' sin kompetí den e festival.
 

Na 1973 Ced ta partisipá na ‘Festival Internacional de la Voz y de la Canción' na Puerto Rico kaminda el a optené e título di ganadó pa voz. E kansion ‘Let the Music Play’ skirbí pa Herman Wegewijs, ku areglo di Alvaro Rojas ta sali na di tres lugá.
 

Despues di e éksito grandi na Puerto Rico el a haña oportunidat pa kontinuá su karera komo kantante / kompositor na Repúblika Dominikana. Na Santo Domingo Ced tabata aktua prinsipalmente den formashonnan musikal di Jorge Taveras.

E inkietut den Ced pa aportá mas na stimulá konsientisashon di identidat propio den e komunidat kaminda el a nase i krese a pone Ced dediká mas na skirbi kansionnan na Papiamentu ku mensahenan profundo.

Na 1975 i 1976 Ced ta realisá dos konsierto ku a marka historia na Kòrsou: Konsierto Unu i Konsierto Dos. Base di 'Konsierto Unu' ta e kansion 'Dunami Un Tiki Mas Di Kòrsou' areglá pa Michael Camilo ku akompañamentu musikal di Caballeros i Monte Carlo bou di direkshon di Jorge Taveras. Konsierto Dos e ta enfoká ainda mas riba kansionnan na Papiamentu. E konsierto aki el a dediká na Augusto Boelijn i Koko le Pol, pa di un forma simbóliko tira lus riba historia musikal di Kòrsou. Pa e okashon ei Ced tabatin kompañamentu di un orkesta formá pa miembronan di Asosiashon di Músiko i Artista di Kòrsou, bou di direkshon di Errol ‘Toro’ Colina. Invitadonan spesial tabata shete maestro dominikano, entre nan Michael Camilo. Despues di ei, Ced a sigui hasi esfuerso pa pone lus riba e generashonnan di artistanan promé kuné. Pa menshoná algun : Erquimides ‘Kimo’ Candelaria, Augusto Boelijn, Pierre Lauffer i Luis Daal den su afan pa sigui promové su idioma Papiamentu.

​

Na 1978 Ced ta biaha pa Italia riba invitashon di e produktor Aldo Pagani, kende ya pa algun aña tabata pidi Ced pa realisá un L.P. kuné. Den e produkshon ei Ced tabatin e oportunidat pa traha den e proseso kreativo ku diferente músiko di renombre internashonal manera Astor Piazolla di Argentina, i e Venezolano Aldemaro Romero. Ced a titulá e L.P., 'Den Dje', ku ta título di un Tumba ku el a graba na Italia. Sin embargo ta e balada, 'Mi No Ke Bo Mas', komponé pa Ced, ta bira un éksito grandi na Kòrsou, Aruba, Boneiru i bou di e diáspora antiano bibá na Hulanda. E éksito grandi di 'Mi No Ke Bo Mas' a pone ku Ced tabata hopi mas ku e añanan anterior pa sigui promové su L.P. na radionan na nos islanan. Alabes el a organisá vários konsierto basá riba e éksito di 'Mi No Ke Bo Mas'.

​

Ced e aktor – eskritor di obra teatral.

Den kabamentu di añanan setenta Ced ta aktua komo aktor den obranan presentá pa e Thalia. Na un festival di teater na Aruba, Ced ta risibí e premio mihó aktor ku e obra 'Chines'. Despues Ced a kuminsá skirbi obranan teatral ku e elenko di Thalia a presentá i tambe otro obranan presentá pa vários aktor lokal. Ced mes a dirigí vários di su obranan ku ser presentá den Sentro Pro Arte. Alabes Ced a presentá na un Festival Internashonal di Drama, ku a tuma lugá na Aruba, ku un obra teatral di su pèn bou di direkshon di Fifi Rademaker. Na mediado di añanan ochenta Ced ta skirbi e mini seri di ocho parti pa televishon, titulá 'Pentagram', kual a ser produsí pa Mavis Albertina.
 

Ced ta sigui su karera musikal lokal i internashonal.

Na kabamentu di añanan setenta, i komienso di añanan ochenta, Ced ta ofresé komposishon di dje na diferente kantante ku a presentá esakinan den festivalnan lokal, manera e festivalnan preliminar na Festival di Oti Internashonal i alabes pa Festival Internacional de la Voz y Cancion na Puerto Rico. Na 1981 e kantante Farley Lourens a interpretá e komposishon di Ced, ‘Un Pekador’, na e Festival Meditour na Portugal. Na e festival ei Farley a sali di sinku finalista. Algun luna despues na 1981 Farley ta interpretá e komposishon na ingles di Ced, titulá ‘Rain’. Na e festival ei Farley ta sali di kuater finalista pa su interpretashon.

​

Den e periodo ei, banda di su komposishonnan na Papiamentu, Ced a sigui skirbi kansionnan na ingles ku e mira pa proyektá su karera internashonal. E ta bolbe biaha ku regularidat pa Santo Domingo pa graba ku su amigu, kompader, Jorge Taveras. Mas despues Ced ta biaha pa New York, huntu ku Jorge Taveras pa laga Jon Fausty hasi meskla di e komposishon nobo na ingles. E kolekshon di kansion ei Ced a emití riba un L.P. ku el a titulá, ‘Traces’. E komposishon na Papiamentu, 'Mi Ta Stimá Bo' ta haña un akohida grandi entre Ced su públiko fanátiko di su komposishonnan na Papiamentu.
 

Festival Añanan Sinkuenta.

Pa rindi honor na kantante -i músikonan ku tabata hopi eksitoso den dékada 40 i 50, Ced a prepará i produsí ‘Festival Añanan Sinkuenta’ ku sosten di Diputado di Kultura, Angel Salsbach. Un elenko di kantante i músiko lokal ku tabata sumamente popular den e époka en kuestion a presentá nan hitnan. Artistanan internashonal ku a presentá den e festival tabata e legendario Daniel Santos i Celia Cruz ku a graba kansionnan na Papiamentu di kompositornan Kurasoleño.

​

Poesia Kantá.

Otro género ku Ced a profundisá den dje ta poema na Papiamentu. Ced a krea melodia i traha areglo pa un kantidat di poema di nos eskritornan lokal. Di esakinan el a produsí 2 CD. Banda di esaki Ced mes a skirbi diferente poema di kua el a kompilá un kantidat den un publikashon imprimí ku el trese riba merkado bou di título ‘Kibrando ku Silensio’.
 

Ced su partisipashonnan na Festival di Tumba.

For di e promé aña di kòntèst di Tumba pa Karnaval na 1971 Ced Ride a interpretá su komposishon den Teater Roxy. Pa hopi aña ku el a sigui partisipá ku Tumbanan inovativo, pero semper respetando e base poné pa su antesesornan. Den e festivalnan den añanan setenta den Teater Roxy, Ced a fungi komo Maestro di Seremonia na vários okashon. Ora ku a muda Festival di Tumba pa Stadion Antoin Maduro, Ced a partisipá diferente aña ku Doble R Super Special Stars.Ku e komposishon 'Bip Bip P’e ‘Nabu' Ced ta sali entre e sinku finalistanan.

Mas despues Ced ta partisipá na vários okashon ku kompañamentu di e agrupashon, E.R.A. Un di e komposishonnan ku mas a hala atenshon den su periodo ku E.R.A. ta e Tumba 'Den Kòrsou Tin Un P.' Na 1997 Ced a risibí e premio komo mihó letra pa e komposishon ei.

Ku e Tumba pa e Festival di 1998 e ta konta den un forma katedrátiko tokante orígen di Papiamentu for di diferente regionnan linguístiko di Afrika (‘desendiente di Kongo ku Angola, Kabo Bèrdè ku El Mina, Luangu i Gene).
 

Ced den naturalesa i historia.

Ced Ride tabata gran amante di naturalesa i inbestigadó pashoná di nos historia i origen di nos herensia. Esaki tabata motibu ku Ced semper a biba i kere ku e nòmber di nos isla ta originá di un para ‘Curasow’ ku tabata biba den serunan di Tafelberg fo’i den epoká ku indjannan tabata okupá nos islanan. Na varios okashon Ced a bishita Cuba pa entre otro profundisá su mes den e religion afrikano Yoruba. Komo amante di naturalesa, Ced tabata ferbiente promovedó di medisina natural. Na 2012 huntu ku su amigunan Cali Boom i Richinel ‘Moes’ Ansano di Fundashon Curasow Sanashon, a organisá e promé Konferensia Sanashon Curacao ku varios kurandero konosí for di nos region.
 

Ced pintor.

Den último añanan Ced a sigui ekspandé su kreatividat komo pintor. Ced a produsí varios obra ku a haña rekonosementu di koleganan pintor di renombre. Na varios okashon Ced a presentá su obranan durante eksposishonnan eksitoso. Den varios kas, ofisina i negoshinan na Korsou tin pinturanan orginal di Ced Ride. Aparte di pinta, Ced a desaroyá su mes tambe komo eskulptor.

 

Un florilegio di su kantikanan ku entre otro 'Pintor', ku ta kansion pa e pelíkula 'Ava i Gabriel' ku ta referí na Ced Ride su amor pa arte komo un pintor.

Hopi kansion di Ced Ride ta pertenesé na e kultura ‘klásiko’ di muzik di Kòrsou.

Algun di su klasikonan ta 'Mi No Ke Bo Mas, Pekador, Mi Ta Stimabo,

Nos Tata (1970), Biña Mas Bieu, Mas Bon, Navidad Sin Padre, Mi Pais'.
 

Un di e kansionnan partiotiko ku mas ta yama atenshon ta e tema : 'Ta Yu Di Kòrsou Mi Ta'.

Den e bolero akí Ced ta boga eksplísitamente pa pueblo rekonosé su identidat

públikamente ku e mensahe : Unda ku bo bai òf unda ku bo ta, no lubidá nunka ku ta yu’i

Kòrsou bo ta’.

 

Ced, yu di Kòrsou.
Komo yu di Kòrsou ku un amor imenso pa su isla, Ced tabatin un atmirashon enorme i a studia bida, obranan i vishon Doktor Moises Frumencio Da Costa Gomes i Luis Daal.
 

Ced a risibí varios distinshon etre otro :

​

1968 - Tambu di Oro

1999 - PremioCola Debrot

2004 - Ridder in de orde van Oranje Nassau

2012 - Dedikashon 'Festival Un kanto pa Kòrsou
2021 - Krus di Mérito

​

​

​